ភ្នំពេញ៖ ប្រទេសចិនបានសម្រេចផ្ដល់វ៉ាក់សាំងការពារជំងឺកូវីដ-១៩ ចំនួន៣លានដូសបន្ថែមដល់ប្រទេសកម្ពុជា ក្នុងការជំរុញយុទ្ធនាការចាក់វ៉ាក់សាំងជំរុញដូសទី៣ជូនប្រជាពលរដ្ឋ។

នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានថ្លែងប្រាប់ក្រុមអ្នកសារព័ត៌មាននៅវិមានសន្ដិភាពថា ប្រទេសចិនបានសម្រេចផ្ដល់វ៉ាក់សាំងការពារជំងឺកូវីដ-១៩ ដល់កម្ពុជាចំនួន៣លានដូសបន្ថែម ដែលធ្វើឱ្យវ៉ាកសាំងសម្រាប់ចាក់ដូសទី៣ដែលទទួលជំនួយពីប្រទេសចិនកើនឡើងដល់៩លានដូសហើយ ដែលនៅខ្វះតែ៣លានដូសទៀតប៉ុណ្ណោះ។

ក្នុងពិធីប្រគល់នឹងទទួល ពហុកីឡដ្ឋានមរតកតេជោនៅរសៀលនេះ សម្ដេចតេជោ មានប្រសាសន៍ថា សម្ដេចនឹងជួបនិយាយជាមួយលោក វ៉ាង យី ក្នុងជំនួបឯកជនមួយ ពាក់ព័ន្ធនឹងការស្នើសុំជំនួយវ៉ាក់សាំងបន្ថែមយកមកចាក់ជូនប្រជាពលរដ្ឋកម្ពុជា។

គិតត្រឹមថ្ងៃទី១១ កញ្ញា កម្ពុជាសម្រេចបានការចាក់វ៉ាក់សាំងជំនួយបន្ថែមដូសទី៣ជូនពលរដ្ឋបានជាង៧៥ម៉ឺននាក់ ក្នុងនោះមានស្រ្តីជិត២៦ម៉ឺននាក់ ខណៈចំនួនពលរដ្ឋដែលបានចាក់វ៉ាក់បាន២ដូស បានជាង៧១ភាគរយនៃពលរដ្ឋសរុប ១៦លាននាក់៕

^{រូបថត: ឡុង សត្យា}